Aquí publicamos o adianto do programa deste ano, para que vaiades anotando nas vosas axendas as propostas que estamos preparando en Máisquemel. Agardamos a vosa participación!
No mes de maio celebraremos o Día Mundial da Abella en Santiago de Compostela, cun programa de actividades que realizaremos entre a Biblioteca Anxel Casal e o Museo de Historia Natural da USC. Esta edición terá como protagonistas os polinizadores e a importancia da súa protección e coñecemento.
Este ano seguiremos descubrindo lugares de Galicia ligados ó mundo da apicultura e das abellas. A finais da primavera viaxaremos ó Courel, para coñecer o noso patrimonio apícola e outros tesouros da nosa cultura e natureza, en concreto nos lugares de A Seara e Quiroga.
Durante o verán, o Ecomuseo Casa das Abellas de Abegondo acollerá varios convivios, nos que debatiremos sobre a situación actual da apicultura, dos problemas das abellas e o medioambiente.
Continuaremos coas experiencias de apiturismo no outono, cunha viaxe a Ibiza na que, ademais de coñecer esta illa do Mediterráneo, aprenderemos sobre flora melífera e os distintos tipos de mel nunha xornada coa Asociación d’apicultors Eivissa, coordinados polos consultores apícolas Fina Gonell e Antonio Gómez Pajuelo.
E xa cara finais de ano teremos o IV Encontro de Mulleres Abelleiras Galegas, co que seguiremos construindo unha rede de mulleres unidas polo interese hacia as abellas e os seus produtos.
Ó longo do ano iremos informando de todas estas actividades e outras que irán xurdindo polo camiño.
Programa Máisquemel 2025:
PRIMAVERA
Día Mundial das Abellas
Biblioteca Anxel Casal de Santiago de Compostela
- Exposición “A crise da polinización, un planeta con plantas estériles?”, cedida por Facultade de Ciencias – Universidade de Vigo.
- Obradoiros, contacontos e presentacións.
Museo de Historia Natural
- Exposición I Concurso Apiarte e entrega de premios
- Obradoiros e roteiros informativos sobre polinización
- Degustación e venda de produtos das abellas
- Actuacións musicais
- Portas abertas no Museo
Apiturismo no Courel
Visitas ó patrimonio tradicional apícola, cultural e natural nos lugares de A Seara e Quiroga
VERÁN
Convivios no Ecomuseo Casa das Abellas de Abegondo
No mes de xullo faremos unha tertulia sobre a apicultura de hai 100 anos comparándoa coa de hoxe en día, basándonos no libro do pai Ledo. É recomendable ler o libro antes de apuntarse ó convivio: “Curso práctico de apicultura” de Benigno Ledo González
OUTONO
Viaxe de apiturismo a Ibiza
Incluirá unha xornada sobre flora melífera e os distintos tipos de mel, coa “Associación d’apicultors Eivissa” e a familia Pajuelo (Fina Gonell e Anonio Gómez Pajuelo)
IV Encontro Mulleres Abelleiras Galegas
Celebración do encontro anual de mulleres que teñen en común o interese polas abellas, cunha visita a un proxecto abelleiro liderado por algunha muller e a realización de charlas e obradoiros que xiran arredor das abellas, dos seus produtos e o empoderamento da muller neste sector.
MÁIS INFORMACIÓN
Costa de San Marcos, 7. 15890 Santiago de Compostela
Tel: 630069635 / Email: info@maisquemel.gal, suso.asorey@maisquemel.gal