O vindeiro domingo 18 de xuño (ATENCIÓN CAMBIO DE DATA por motivos organizativos, antes 17 de xuño) realizaremos unha nova xornada de apiturismo para coñecer o patrimonio tradicional apícola da Costa da Morte e o tipo de apicultura que se practica nesta comarca.
Pola mañá visitaremos os colmeares da Asociación Río Vadebois, situados en Caldebarcos (Carnota), mentres desfrutamos da fermosa paisaxe e contorna.
Xantaremos de campo, se o tempo o permite, e pola tarde realizaremos a Ruta dos Muiños de Louredo en O Ézaro, para descubrir un conxunto etnográfico moi singular, formado por un muiño e unha alvariza con lacenas das abellas, .
O custe de inscrición será de 10 € para membros do Club Máisquemel e 15 € para o resto. Podedes anotarvos ata o día 15 de xuño, escribindo un email a info@maisquemel.gal.
As persoas inscritas recibirán un email co información dos horarios e punto de encontro.
En Caldebarcos realizaremos un percorrido duns 5 Km, ida e volta, que nos levará ós colmeares da Asociación Río Vadebois, pola que veremos tamén varios muiños, ubicados na fermosa paisaxe do Monte Pindo. Hai a posibilidade de facer parte da ruta en coche, por se alguén o prefire.
A Ruta dos Muiños de Louredo no Ézaro é un sendeiro duns 3 Km de lonxitude, ida e volta, e dificultade baixa. Ó longo da ruta poderemos ver varios muiños e finalmente visitaremos o complexo etnográfico do Ézaro. Ademais, poderemos desfrutar tamén da famosa e espectacular fervenza do Ézaro, onde desemboca o río Xallas.
